Geboore z’Basel am 12.07.1964
Birgrort Mosen (LU) und Riehen (BS)
Umwältbirootr, Dozänt (dipl. nat. ETH)
Nationalroot syt em 31.05.2010
Mitgliid vo dr Kommission für Umwelt, Raumplanung und Energie NR (UREK-NR)
1. S’Intrigiere an dr Basler Fasnacht isch vom usstärbe bedroht. Isch dir das e-n-Aliige und falls jo, wie wottsch du däm aggtiv gägewirgge?
“Es isch ächt zem Hoor verliere,
wil kei Sau duet intrigiere.
Oh, wie schlimm s um d’Wält doch schtoht,
wenn kai Waggis sait wo’s dure goht.
Drum wird y z’Bärn interveniere
und dr Bundesroot so lang intrigiere,
bis dä so vyyl Räppli in de Hose hett,
dass er sofort e Intrigationsgsetz erloh wett.”
2. S’Fasnachtscomité drait sich mit em Gedangge, d’Naaselengi vo Waggis z’reguliere. Was isch dy Mainig do drzue?
“Jetz sölls - dasch doch e Witz -
de Waggis an ihre Naseschpitz.
Alles wänn d’Behörde reguliere,
es isch (scho widr) zem Hoor verliere!
Me könnt s’Problem - säll wurd mi raize -
leese, wie mit de Fumoar Baize:
Mr grinde e Nosoar-Waage-Club (quasi als Naase-Oase)
Und zaige em Comitee die langi Naase!”
3. Sölle au glaineri Fasnachtsclique vom Fasnachts-Comité unterstützt wärde?
“Au für grossi Flüss brucht’s glaini Quälle.
Au glaini Waggis bruche Schtutz zum Bälle.
Und frogsch mi no, öb mir das gfalli,
sag i als Sozi glar: Statt für wenigi – fir alli!”
4. Was isch dy Positioon gegenübr dr Zuewanderig vo Waggis us dr EU?
“D’ Fasnacht isch e haide Schpass
Do luegt doch kei Sau uff e Pass.
Ohni Europäer miecht se au kai Sinn
will d’Waggis jo Franzoose sin.”
5. Welles Wurfmateriaal söll vom Bund subventioniert wärde und welles vo de Kantöön?
“Fir die ganz perfide Schüss
schpändet Bärn syt neischtem Nüss.
Will vo däne –ich beduur das sehr -
git’s bim Bund wie Sand am Meer.
Basel-Schtadt zahlt Mimösli zum schpeziell z’verschängge
an d’Rampasse vo Muttenz, Ammel und Biel Bängge,
wil die allewyyl empfindlig reagiere,
wenn Basel mit Lieschtel will fusioniere.”
6. Wurdisch du dr Adraag unterstütze, Waggis zum UNESCO Wältkultuurerb z’erglääre?
“Sichr, und y hätt grad non e Idee,
won-y gärn wurd umgsetzt gseh:
Als Nati-Hymne - das muess ys glinge -
soll d’Schwiz ab jetz dr Morgeschtraich singe.”
7. Welli vo dyne in dr letschte Amtszyt ygraichte Vorstöss isch für Waggis am wichtigschte gsi?
“I wott – und das per Interpellatioon-
e Solardachkataster fir d’Natioon,
wil’s dät de Waggis sichr gar nid gfalle
d’Orange uf Solardächer z’knalle.”
8. Was könne Waggis vo dynere nögschte Amtszyt ganz konkreet erwarte?
“Zem Schutz vo ganz spezielle Schpezi
wo nie dörfe usstärbe oder bedroht syy,
macht dr Bund zem Glück scho gly
e „Bio-diversitäts-strategie“.
I miecht mit Elan mi uf d’Pischte
dass denn uf däre rote Lischte,
speziell wenn sie intrigiere,
unseri gliebte Waggis täte figuriere.”
9. ... in aim Satz: worum sölle Waggis ussgrächnet di wähle?
“Denn mien dir arme Waggis Dropfe
e Duubel weniger mit Räppli schtopfe,
wil die kulturloose Bärner Kollege,
d’Session jedesmol uf d Fasnacht lege,
und dr Jans, dä pflichtbewussti Huffe,
in der Session nid duet feschte oder suffe,
sondern damit Basel z’Bärn meh duet glänze
sogar die gliebti Fasnacht wurd schwänze.”
(UFF, genau ai Satz!)