Wär mer sinn und was mer wänn
D’Malefyz-Bâlaari besteehn us zwai ganz schreege Veegel: em Däni S. ("Il tedesco") und em Beni S. ("Commissario tecnico", odr eifach "CT"). E Källr hänn si nit, abr ihri Garage und Wärggstatt isch im Gundeli, wo dr Däni S. deheime isch. d'Bâlaari sinn also vyllicht die einzigi Waggisglygge im gröschte Quartier vo Basel mit emmene Usländrateil vo 40% - wo wäre Waggis bessr uffghoobe...
Duur ihre akute Migratioonshintrgrund sinn si beschtns gwalifiziert: dr einti isch ibr die griene Gränze im Noorde koo (Gelsenkirchen Ueckendorf, diefschte Ruhrpott), dr ander us bella Italia (Salernitano!). Beidi sinn Muschtrbyspsyyl vonere erfolgryche Intrigierigsbolytygg - abr achtig: es isch e explosyvi Mischig, surtout am Sujethogg.
Si sinn scho allewyyl Waggis im Härze gsi und hänn zem erschte mol 2008 zämme Fasnacht gmacht, dert no bi de Balggebieger (Sujet totaal braav: ‚Basel grabt anderscht’). Noch numme zwai Fasnachte sinn d’Balggebieger abr in die eewige Fasnachtsjagdgrind ibrdrätte.
Dr Beni hett drnoo d’Zoggeli zersch emol an Naagl ghängt; dr Däni hett als Ainzelmasgge wytrgmacht und Fasnacht vo unde als Malefyz-Bâlaari agfange, mit Konzentratioon uffs Intrigiere und dr Ruggkehr zu de aigentligge Waggis-Wurzle.
Am Bâlaa-B-Q 2010 hett sich dr Beni drnoo entschiide widr in d’Hoose z’styyge, syt 2011 simmer widr z’zwait uff dr Gass (au wemmer nie ellai blyybe und immr schreegi Veegl kenne lehre...).
Als neyschti personelli Vränderig hämmer im Summr 2012 dr Zuezug vo dr "la bionda" kenne vrmälde. Si isch zue 2% im Mandaat agstellt und organsiert em Beni sy Agända - ass är ändligg emol sini Termyn in Griff bekunnt ("Du Däni, hämmer scho öbbis am... was nei, denn hämmr dr Grill, au cazzo, dört ha-n-y doch scho XYZ").
Arbetsuffdailig hämmer aigentligg e kaini, ussr ass mer konsegwänt immr alles zämme odr drennt dien mache. Dr Beni (als glehrte Schryynr) isch handwärgligg zueständig (bi de Balggebieger hett är dr Waagechef gmacht) und dr Däni macht d’Bâlaarisyyte und dr Zeedel.
D’Reggwisite, s’Goschdym und d’Laarve entwäärfe mer zämme (d’Laarve mit em Sömi, em rumpelsuurigschte und geniaalschte Laarvebauer vo Basel); nadyrligg isch es jedes Johr andersch und sovyyl wie meegligg wird sälbr gmacht; als Sujetwaggis (Ehresach!) bhalte mr die alti Traditioon ass mer lokali Sujet usspiile.
Abr als Glygge im eigentligge Sinn diemer ys jo nit vrstoh; mer sinn vyyl z chaotisch und wild. Im Summr gsehmer ys amigs drey Meenet nit und e Hogg gitt’s immr wenn ain em andere alütet odr schrybt „du, wie wär’s widr mol, mer sötte ...“. In de Verainsstatute hämmer juscht ai Paragraaph, und dä haisst § 1 „Wemmer e Lämpehogg bruuche, no heere mer uff.“
Mer sinn niene ydrait, finanziere-n-ys bis uff e letschte Rappe sälbr, ibrkemme und wänn kaini Subventioone und hänn au kaini Passivmitglidr; drfir laade mer unsri Frinde jedes Johr zem Apéro uff dr Brugg y (lut de Alte Stainlemer e "Kult- und Pflichtaloss" an dr Fasnacht) und an grosse Bâlaa-B-Q im Summr, mr mache Jassturnier, Gaschtvordrääg, Stadtfiehirige... eifach was ys Froid macht.
