E glai Gschicht vom Bâlaari

Säll interessiert doch kai Sau, ha-n-y dänggt - bis noch zwai Johr ändligg emol aine uff die Websyyte gange-n-isch und gsait hett me sett do scho ebbis drzue schryybe. Hejodrnoo:

Dr Bâlaari isch ybr kai Zwyyfel erhaabe: Geburtsort Basel, Byrgerort Basel, Wohnort Basel. Zem sich e glai weni e internationaal Image zue z'tue, laitet är sit e paar Johr e Orangebängel-Schuel irgendnaaime syd-eschtlig vom Haueschtai, so zwische-n-Aarau und em Toggeburg, innere Stadt wo ganz speziell isch will si e See hett und äh... und äh ... und ... (es gitt sichr no-n-e zwaite Grund, abr y kumm jetz grad nit druff).

En Usbildig hett dr' Bâlaari au derfe gniesse, au wenn das vyyli nit wurde glaube. No dr' Primaarschuel z'Basel isch är uff Ghaiss vom Fasnachtscomité in e WOS (Waggis-Orientierigs-Schuel) ybrwyyse worde, wo-n-är nullkommapfiff Karriere gmacht hett als Värslibrynzler und syni Fähigkaite im Räppliwärfe hett kenne perfeggtioniere, vorällem gäge syni Lehrer (dert hett är denn us unbikannte Grynd e Diploom ybrkoo; es hett en Ehreplatz im Clicquekäller, grad näbe-n-em Portrait vom Felix Rudolf von Rohr). Drnoo sinn e paar Johr im Wälschland drzue koo, abr wo dr Obmaa vom Comité gheert hett ass y dert binnere Fête des Vignerons Räppli ummegriert ha, ha-n-y miesse e chli Gras ybr d'Sach lo waggse und e lange Usslanduffenthalt yzooge. Y ha denn z'Sydafrika gläbt und uff e paar Insle ganz wyt ewägg, ebbe zwai Johr in de-n-USA (im hinterschte Bush), drnoo z'Neyseeland und no (jo, y muess es zuegäh) im grosse Kanton.

Abr wie's halt eso isch mit ys Basler, s'Haimweh siigt und es isch numme e Froog bis es aim widr an Rhyy verschloot. Wo die Orangebängelschuel vor e paar Johr uff mi zuekoo isch mit emmene Aagebot, ha-n-y kai Sekunde zeegeret  - und ha drnoo dänggt y kennt myni im Ussland erworbene Qualifikatioone au grad innere Waageclique wyter entwiggle. Das isch denn au zwai Johr ganz guet gloffe, abr me hett sich im 2009 trennt und separati Wääg ygschlaage, schaad, abr s'isch s'beschte-n-eso. 

Und das isch denn zer aigentligge Geburtsschtund vom Malefyz-Bâlaari worde. D'Fraid an dr Fasnacht niemt aim niemer, und Waggis kasch jo bekanntligg nit wärde, Waggis muess me syy. Me ka au ohni Waageclicque mit Lyyb und Seel Fasnacht mache und jetz trybt e neyi Ainzelmasgge ihr Unwääse näbe-n-em Cortège, irgendnaime im magische Dreyegg Wettschtaibrugg - Rhyygass – Rhyybrugg. Uss em Waage isch e Wäägeli worde, abr au dert hett’s Dääfi, Reesli und – wenn’s denn partout muess syy – e Hampfle Räppli. Und säll hett e grosse Vortail: uff em Waage sinn die Passive no sichr gsi vor mir, abr jetz bi-n-y zmitst dinne, genau dert wo’s no vyyl meh danggbari (und nyt ahnendi!) Opfer git und me no Luscht und Luune ka intrigiere…

Dr Malefyz-Bâlaari wott sich bemiehe, alti Traditioone widr uffläbe z'loo ("E glai Gschicht vom Waggis" scho glääse?). Dr Waggis isch, mit all syne Schweche, e Maa vom Volgg, ain wo gsellig isch und sich dert wohl fiehlt, nit numme-n-aine wo vom Waage oobe-n-aabe Dääfi vertailt und Räppli spuggt. Die gross Kunscht vom Waggis isch s'Intrigiere, s' "aifach druff los schwätze mit de Lyt", se in e Gspröch verwiggle, respäggtvoll uff en Arm näh, au e chli ybers Lääbe philosophiere ohni das zue ärnscht z'näh - und natyrligg au sich sälber dur e Gaggo zieh. S'wär scheen wenn dr Waggis in dur Zuekumft widr me eso wohrgno wurd und dr Malefyz-Bâlaari wott drzue bytrage, au wenn das als Ainzelmasgge natyrligg meh symbolisch isch.  

E Sujet isch allewyyl Ehresach, e Zeedel und e rächt Goschdym (mit Larve und Händsche) dängg au. D'Ziite vo Knoche und Munifiesel sinn verbyy, abr drfyyr ha-n-y wie anno dazumals e Ykaufsnetzli drbyy und wär rächt intrigiert mit mir, dä ybrkunnt zer Belohnig e Ziibele (odr, wenn ebber sauglatt isch, e Riebli). De triffsch dr Malefyz-Bâlaari in Baize, Käller und uff dr Gass, mit andere Waggis, unverdrossene Passive, dr Familie (e agfrässeni Passivi und zwai glaini Waggis), odr au ganz ellai. Wie alli Verträter vo dere ehrewärte Zumft intrigiert dr Malefyz-Bâlaari firs Lääbe gärn - dient en aifach ungeniert aahaue, är bysst nit (odr wenn, ganz sälte).